O Noso Vindeiro Rival…

O NOSO VINDEIRO RIVAL:

Planasa Basket Navarra Club

 

escudo_basket_navarra         VS           Breo

 

Partido compricado, e moito, o que afronta o Breogán este vindeiro mércores. Se a situación deportiva non é a máis esperada, co equipo situado na oitava posición, con igual número de vitorias e derrotas, a tres vitorias do segundo clasificado Melilla e a 6 do intratable líder Palencia, que leva desde a segunda xornada sen perder, precisamente ante o cadro celeste, peor é a crise institucional, cunha xunta de accionistas que xa se prevía quente e da que debera saír o novo Consello de Administración que guiase desde os despachos a nave celeste… Pois ben, nas últimas horas, o actual Consello de Administración lanza a bomba da venda das accións en Autocarteira, en paquete único para un único novo accionista que terá maioría no futuro Consello de Administración. Todo sen ser aprobado en Xunta e coa dúbida de se se fixo no Consello de Administración en funcións. O vacío de poder na nave celeste vense reflectindo desde a saída de Alberte do Consello, e agora agravado pola situación deportiva dun equipo que non termina de arrincar, e no que cada quen semella face-la guerra pola súa conta. Nestas chegou e foise Gerardo Suero, o dominicano que viña a ser o substituo do añorado James Feldeine. Devin Wright e Matulionis no disparadeiro e mentres tanto Mamadou Samb, que comezara a tempada a un nivel estratosférico, non viaxa a Navarra trala presunta escordadura de nocello que sufríu en Cáceres da que pasadas dúas semanas non tivo a evolución agardada. Así que nesa tesitura chega o Breogán á visita aos navarros, que contan á súa vez coa peor xeira aberta da liga, logo de catro derrotas de xeito consecutivo ante Lleida, Palencia, Melilla e Coruña, conseguindo a súa última vitoria hai máis dun mes, en Anaitasuna ante o outro representante galego da categoría ademais do xa nomeado Basquet Coruña e o propio equipo celeste, o COB. Dáse ademais a circunstancia de que as 5 vitorias que os navarros levan na clasificación, conseguironas xogando ante o seu público, o que dá un claro sinal de que non vai ser un equipo fácil de batir, con toda a problemática que arrastran os de Lisardo, e que ademais son un equipo que sufre, e de que xeito, co rebote. Sendo Navarra un dos equipos cuxa maior fortaleza está no seu xogo interior, pinta partido complicado para os celestes. Fica claro que gañar alí non ha ser fácil.

¿Obxectivo?

O obxectivo dos navarros semella claro este ano. Volver ilusionar á boa afección pamplonica. Para elo a confección do plantel con moitísima xente curtida xa na LEB en diferentes equipos do nivel medio/alto, xunto coas renovacións que o clube puido permitirse. Así, co obxectivo primordial de volver enganchar á afección ao Anaitasuna, tal como se conseguíu en parte da tempada pasada sobre todo ao principio, xa que o equipo foi de máis a menos, arrastrado pola saída do que estaba a se-lo MVP absoluto da competición até o momento sen lugar a dúbidas, Hernández-Sonseca. E máis logo dunha tempada anterior, no que o divorcio entre a bancada e o equipo fora total, rematando nun descenso de categoría que finalmente non chegou a darse. Así, o obxectivo, que de momento e vista a clasificación non parece moi preto ten que ser loitar por estar na zona nobre da clasificación e poñer as cousas difíciles nun eventual playoff aos “primeiros espadas” da competición, especialmente no fortín de Anaitasuna.

 PLANTEL

Coma adestrador, na súa segunda campaña consecutiva, Sergio Lamúa (39 anos) para o técnico que sustituíra no seu momento ao mítico Ángel Jareño. Continúan no plantel da tempada pasada, Joaquín Bonhome, Íñigo Zabalo, Iván García, Miki Servera e Iñaki Narros. Coñecedores da categoría chegan desde Palencia Guillermo Justo e Óliver Arteaga, e desde Clínicas Rincón o senegalés Maodo Nguirane. Completan o plantel Serge Konan e o ex-Ferroviario Quique Garrido. A experiencia ACB será tamén aportada por Sergio Rodríguez, que chega procedente do Iberostar Tenerife.

Grupo-2-1024x587

BASES

9 Íñigo Zabalo: 19 anos. Un dos máximos baluartes da canteira do Planasa Navarra, con capacidade para ir progresando ano tras ano. Está a tentar a oportunidade de mellorar para o seu futuro da man de Sergio Lamúa, que ben o coñece da súa época xuvenil. O base navarro promediou o ano pasado 5,7 puntos, 1,7 rebotes e 1,1 asistencias para 2,7 de valoración no EBA. Este ano leva 1,4 puntos e 1,4 de valoración nos apenas 6 minutos xogados.

13 Miguel Servera: 23 anos. Base alto de 1.97, que grazas ao seu físico pode desenvolverse na posición de escolta. É un xogador que destaca pola súa polivalencia. Cumpre a súa segunda tempada no conxunto navarro. O ano pasado promediou 9,4 puntos, 3,4 rebotes e 2,4 asistencias para 9,5 de valoración. No que levamos de tempada suma 8 puntos, 4 rebotes, 2,6 asistencias para 7,1 de valoración.

33 Quique Garrido: 33 anos. Destaca pola súa aportación en ataque, e a súa efectividade desde a liña de 6,75. É especialmente perigoso en situacións de pick and roll en accións de un contra un na que, coa súa boa lectura de xogo, pode aproveitar situacións favorables para repartir asistencias. Na defensa é intenso e constante, sendo un incordio para o seu par na pista. Ademais ten amplo recorrido nas categorías FEB, tendo xogado en Canarias, Palencia, e a tempada pasada en Melilla. Precisamente a campaña pasada promediou 8,2 puntos, 1,7 rebotes e 3,2 asistencias para 6,6 de valoración. Na presente campaña leva 7,6 puntos, 1,3 rebotes e 2,3 asistencias para 4,9 de valoración.

ESCOLTAS

3 Guillermo Justo: 30 anos. Veterano escolta nacido en Gran Canaria. Trátase dun tirador con capacidade de anotación e que defensivamente cumpre sobradamente. A súa principal arma en ataque é o tiro de tres puntos, tanto a pé parado coma en saída de bloqueos. En defensa cumpre baseándose na intensidade e agresividade. Desenrolou a súa carreira deportiva nas categorías FEB. O ano pasado incorporouse ao Palencia substituíndo ao lesionado Romà Bas. Promediou 5,1 puntos, 1,1 rebotes e 3,4 de valoración. Na presente tempada leva 4,4 puntos e 2,5 de valoración en apenas 17 minutos.

7 Joaquín Bonhome: 29 anos. Caracterízase durante as tempadas que leva na LEB Ouro, por sempre dalo todo na pista, destacando especialmente pola súa intensidade defensiva e a súa capacidade para lanzar desde o perímetro, posiblemente as dúas cualidades que mellor definen o seu xogo. Cuarta tempada a que leva no conxunto navarro, anteriormente estivera no U.B. La Palma e en categorías inferiores do Cajasol. A tempada pasada, o xogador cordobés sumou 6,2 puntos, 2,1 rebotes e 4,8 de valoración. No que levamos de tempada leva 4,6 puntos, 1,5 rebotes e 2,9 de valoración.

ALEIROS

4 Sergio Rodríguez: 22 anos. Chega cedido polo Iberostar Tenerife, clube co que vén de renovar até a campaña que vén, logo da boa campaña disputada o ano pasado en Ávila co clube de LEB Prata, tamén cedido. Incorporación valorada coma moi positiva, xogador novo e con moitas gañas. Trátase dun aleiro diferente, que axuda tanto en ataque coma en defensa. A tempada pasada, no Obila promediou 11 puntos, 4,3 rebotes e 1,6 asistencias para 9,6 de valoración. No que levamos de tempada leva 6,4 puntos, 2,6 rebotes e 5,9 de valoración.

15 Iñaki Narros: 34 anos. O auténtico estandarte do conxunto navarro, tendo vestido 167 veces a camiseta do Navarra Basket Club, sendo o segundo xogador que máis vestíu a verde do conxunto pamplonica tras Iñaki Sanz. Sendo ademais o máximo anotador da historia do clube. Trátase da referencia ofensiva do equipo, proporciona anotación desde o exterior grazas á capacidade de tiro e a boa finalización de contraataques e xeración en pick and roll, tanto para tirar como para penetrar. O ano pasado sumou 5,1 puntos, 1,8 rebotes e 1,7 asistencias para 1,4 de valoración en só 6 partidos de liga e un de playoff. No que levamos de tempada, promedia 10,7 puntos, 2,2 rebotes e 6,4 de valoración.

ALA-PÍVOTS

11 Iván García: 29 anos. Trátase dun interior con amplísima experiencia tanto nas ligas FEB coma na Liga Endesa. Formado nas categorías inferiores do FC Barcelona formou parte do Cornellá, despois foi a Zaragoza, onde conqueríu o ascenso co CAI, xogou despois en Valencia, pero sen render coma se agardaba. Posteriormente voltou ao Barça B e agora cumpre a súa segunda campaña no clube navarro, onde se sinte agusto. O ano pasado sumou 11,3 puntos, 4,5 rebotes e 1,6 asistencias para 9,4 de valoración. Nesta tempada leva 9,4 puntos, 4,1 rebotes e 1,9 asistencias para 9 de valoración.

17 Serge Konan: 24 anos. Xogador que estaba sen equipo, logo de varias actuacións en clubes de EBA. O xogador, que estaba a proba adestrando cos de Lamúa, finalmente conseguíu quedar no clube navarro. Xogador que ten varios anos de experiencia e que está principalmente para cumpli-lo rol de axudar ao equipo no que necesite, no rol que lle pida o adestrador.

PÍVOTS

12 Óliver Arteaga: 32 anos. Posiblemente o xogador que máis asubíos se leva da bancada lucense polo seu pasado no cadro celeste e, sobre todo, pola súa saída que tivo pouco de elegante. Trátase de meirande estrela do cadro navarro. Un dos xogadores máis determinantes da categoría na súa posición. Experiencia en LEB Ouro e tamén en ACB, o que unido á súa calidade convérteno nunha das referencias do equipo. Ademais coa súa mobilidade e envergadura proporciona intimidación e rebote. O ano pasado estivo no Palencia, co que foi eliminado entre asubíos da afección lucense no Pazo dos Deportes, promediando 9,5 puntos, 8,2 rebotes e 1,2 asistencias por partido para 13,4 de valoración. Este ano subíu as súas prestacións e leva 18,3 puntos, 10,1 rebotes e 1,7 asistencias por partido para 26,3 de valoración, sendo un dos xogadores máis valorados da liga.

19 Maodo Nguirane: 22 anos. Xogador procedente do Clínicas Rincón, e anteriormente xogou ás ordes de Joan Plaza a Liga Endesa e a Euroliga. Despois de cinco anos entre o primeiro equipo e o vinculado, chegou o momento de dá-lo salto lonxe da Costa do Sol, concretamente ao cadro navarro. O ano pasado, co Clínicas Rincón promediou 4,4 puntos e 3,2 rebotes para 3,8 de valoración. No que levamos de tempada, Nguirane leva 5,7 puntos, 4,5 rebotes e 7,4 de valoración.

¿Como chegan?

Ámbolos dous equipos chegan coa lousa das derrotas coma un verdadeiro freo para as súas respectivas aspiracións. Se cadra os de Lisardo, co futuro da entidade no aire, con tódolos problemas posibles, con só oito xogadores para afrontar o partido, coa recente marcha do fugaz Gerardo Suero, parece estar peor nese eido, sen embargo Navarra, logo de sobrevivir ao treito máis duro do calendario, con Lleida, Palencia, Melilla e Coruña de xeito consecutivo con catro derrotas, vén neste partido o momento idóneo para pechar un bo ano para os navarros, e cecais, por que non dicilo, tamén o rival idóneo, pola entidade do mesmo, e polo momento que atravesan. O Breogán só contará con Dani López, Sergio Llorente, Álex López, Nikola Rakocevic, Osvaldas Matulionis, Devin Wright, Travis Nelson e Fede Ucles para este partido, e Navarra sabe que a súa remontada pasa por pechar o ano cunha vitoria, que, de producirse, continuaría a xeira positiva na casa, só interrumpida polas derrotas ante Lleida e Melilla. Ademais, poden ver achegarse a un dos rivais que marcan esa fronteira polos playoffs, coma é o propio conxunto celeste, que, de caer en Anaitasuna, quedaría a só unha vitoria dos navarros. Semellan ingredientes motivadores abondo para que os navarros sexan os que lle vaian poñer pementa ao asunto.

¿Quen é favorito?

Non semella fácil buscar un favorito nun partido estremo coma é este. En principio, o Breogán conta con só oito profesionais para afrontar o partido, polo que semella pouco para un partido a cara de can, coma pode ser este en Pamplona. Se miramos home por home e posición a posición, o Breogán debera ser superior, mesmo cos oito homes que van xogar. Sen embargo, as malas sensacións e o terremoto que sacuden á entidade nas últimas semanas, fan que o partido teña un prognóstico difícil. Se cadra habería que fixalo en varias claves;

Breo Navarra

O factor cancha; Navarra leva dúas derrotas consecutivas na casa, ante bos equipos coma Lleida e mais Melilla, e quere cortar esa xeira canto antes. Trátase dun equipo moi forte, que de feito levaba até o partido de Lleida, pleno na súa casa, non coñecendo a vitoria lonxe de Anaitasuna. Ademais, o Breogán baixa o seu rendemento lonxe do Pazo, polo que esta clave semella bastante favorable ao conxunto navarro.

As necesidades; están presentes nos dous equipos, pois ámbolos dous están moi por debaixo do que cabería esperar. Lembramos que o Breogán hai pouco máis de cinco meses perdía no quinto e último partido do playoff en Ourense as súas posibilidades de ascenso. Hoxe é oitavo, e de non mediar unha segunda volta prácticamente perfecta, os lucenses, á espera dos reforzos que poidan vir, non chegarán á final da liga nas mesmas condicións có ano pasado. Necesidades tamén no conxunto navarro, coa peor serie aberta da liga, sendo catro derrotas consecutivas, e máis preto do descenso que dos playoffs. Iso si, agora mesmo Breogán supón un dos equipos que marca esa fronteira dos playoffs, polo que de gañar os pamplonicas, ficarían a só unha vitoria dos lucenses. En calquera caso, a derrota suporía, para uns e outros, unha lousa compricada de levantar moralmente.

O plantel; parece que o Breogán ten, home por home, mellor plantel que Navarra, pero os pamplonicas contan con superioridade numérica, xa que os lucenses só contan con oito xogadores para disputa-lo partido en Anaitasuna.

Polo que respecta á historia, o conxunto navarro foi fundado no 2007, polo que só se medíu ao Breogán nas últimas tempadas, desde a 2010/11 até a actual. A historia nos di que a igualdade é absoluta, pois nos 10 partidos que xogaron até o de agora, repártense 5 vitorias cada un, con 3 vitorias na casa e 2 a domicilio. Así pois, en Anaitasuna, o Breogán venceu en dúas ocasións, a última delas, na xornada 4 da pasada tempada. Semella que esta vez, as diferentes claves apuntan a Navarra coma favorito para este partido, pero os partidos hai que xogalos, e os celestes sempre dan a súa mellor cara cando máis difícil o teñen. Que cara ofrecerá o Breogán este mércores. Saberémolo a partires das 21.00 en Anaitasuna. FORZA BREO!!!

Advertisements

Posted on 30 Decembro 2015, in Encontros, Ouro, Xeral and tagged , , , , , , . Bookmark the permalink. Deixar un comentario.

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair / Cambiar )

Twitter picture

Estás a comentar desde a túa conta de Twitter. Sair / Cambiar )

Facebook photo

Estás a comentar desde a túa conta de Facebook. Sair / Cambiar )

Google+ photo

Estás a comentar desde a túa conta de Google+. Sair / Cambiar )

Conectando a %s

Baloncesto con P, de Palencia claro

todo por Palencia Baloncesto

@KIAenZona

Información sobre o Club Baloncesto Breogán S.A.D.

Blogoncesto

Información sobre o Club Baloncesto Breogán S.A.D.

ZonaOCB

Información sobre o Club Baloncesto Breogán S.A.D.